SSON-liðar á Hraðskákmóti Íslands....

Tveir félagsmenn SSON tóku þátt í Friðriksmótinu/Hraðskákmóti Íslands í gær.  Það voru þeir Ingimundur Sigurmundsson og Magnús Matthíasson.

Mótið var sérstaklega vel mannað og meðal keppenda voru 5 stórmeistarar og 10 alþjóðlegir og FIDE meistarar.  Þeir kumpánar Ingimundur og Magnús vissu svo sem að við ramman reip væri að draga en stefndu á að gera sitt besta og sjá hverju það myndi skila.

Mótið var 11 umferðir og voru tefldar 7 mínútna skákir.  Þegar mótið var rétt hálfnað höfðu þeir félagar komið sér fyrir um mitt mót og voru 38. og 50. sæti.  Ingimundur náði því miður ekki að halda fullum dampi síðari hluta móts og má líklega skrifa það á reikning þess að mótið fór fram í Landsbankanum sem er vinnustaður Ingimundar-sem er jú þekktur af einstakri gestrisni sinni, hann endaði með 4 vinninga og í 55. sæti. 

Magnúsi gekk heldur betur og endaði með 7 vinninga og endaði í 16.sæti.  Þeir mættust reyndar í mótinu og gerðu jafntefli í hörkuskák þar sem Ingimundur féll á tíma með mun vænlegra tafl en Magnús einungis með kóng sinn á borði.  Magnús hlaut síðan verðlaun fyrir bestan árangur skákmanns með minna en 2000 skákstig.

Fleiri Sunnlendingar tóku þátt og þar á meðal var einn allra efnilegasti skákmaður ungu kynslóðarinnar á landinu Emil Sigurðarson frá Laugarvatni sem stóð sig með sóma og hlaut 4 vinninga og endaði í 58.sæti.

Vinir okkar frá Vestmannaeyjum sendu þrjá keppendur til leiks yfir hafið og fór þar fremstur stórmeistarinn kunni Helgi Ólafsson sem var í toppbaráttu allt mótið og endaði í 5.sæti.  Ingvar Þór Jóhannesson varð síðan 17. og Þorsteinn Þorsteinsson hin kyngimagnaði liðsstjóri þeirra Eyjamanna átti einnig mjög gott mót og náði 20.sæti.

Þökkum mótshöldurum kærlega fyrir vel skipulagt og sérstaklega skemmtilegt mót.

Sigurvegari mótsins var alþjóðlegi meistarinn Jón Viktor Gunnarsson.  Þröstur Þórhallsson var annar og þriðja sæti náði Jóhann Hjartarson með 8 vinninga.

Nánari upplýsingar: http://chess-results.com/tnr41703.aspx

 

Gleðileg Jól !

Nú er jólin ganga í garð tökum við okkur frí frá skákiðkun. 

Tveir félagar eru reyndar skráðir til leiks á Íslandsmótinu í hraðskák sem fram fer sunnudaginn 19.des en það eru þeir Ingimundur og Magnús Matt.

Starfið hefst aftur af fullum krafti í janúar en þá er m.a. á döfinni að taka tveggja kvölda sveitakeppni við Skákfélag Vinjar, nú síðan er einnig hið árlega Janúaratskákmót og ekki má gleyma Suðurlandsmótinu sem fram fer fyrstu helgina í febrúar. 

fyrir hönd stjórnar óskar formaður félögum gleðilegra jóla og mikillar farsældar á nýju ári.

Afmælismót Jóns L. Árnasonar stórmeistara

Skákmót til heiðurs fyrsta heimsmeistara Íslendinga stórmeistarans Jóns L. Árnasonar verður haldið að Hótel Glymi í Hvalfirði sunnudaginn 12.des.

Ef félagsmenn hafa hug á að taka þátt í mótinu eru þeir beðnir um að hafa samband við formann SSON varðandi samflot á skákstað.

Nánari upplýsingar:

http://www.skak.blog.is/blog/skak/

Á vef HSK má..

...sjá ljósmyndir sem teknar voru á Héraðsmóti HSK í skák sem fram fór nýverið...

http://hsk.is/myndir_yfirl.cfm?flokkur=421&page_id=5

Skákfélag Íslands heiðrar SSON með nærveru sinni...

......miðvikudaginn 8.des kl 19:30 í Selinu á Selfossi. 

Félagar í Skákfélag Íslands sem  munu heimsækja okkur Selfyssinga og nærsveitunga á miðvikudagskvöldið og taka þátt í 9 umferða hraðskákmóti með okkur.  Meðal þeirra sem munu koma eru nokkrir af Íslandsmeisturum félagsins.

Margir glæsilegir vinningar í formi jólabóka í boði.  Hvetjum alla sem áhuga hafa á að mæta að láta sjá sig og taka þátt í skemmtilegu móti.

æfingin skapar....

Það voru nokkrir Selfyssingar sem mættu í Selið í kvöld og tefldu sér til gamans og yndisauka þrátt fyrir að ekkert stórmót hafi verið í gangi eins og undanfarna tvo mánuði.

Gaman að sjá 3 úr sigursveit sveitakeppni HSK mæta í kvöld, greinilegt að þeir ætla sér ekki að liggja á gullum sínum heldur bæta sig enn og styrkja.

Athygli vakti reyndar að 1.borðs maður bronssveitar Þorlákshafnarbúa lét sjá sig í kvöld og ekki nóg með það heldur gerði hann sér lítið fyrir og vann hraðskákmót sem tekið var.  Gaman að sjá unga metnaðarfulla menn sem tilbúnir eru að læra og bæta sig.

Skákfélags Íslands hefur boðað komu sína á Selfoss næsta miðvikudagskvöld með félagsmenn sína, þar á meðal nýbakaða Íslandsmeistara og verður af því tilefni blásið til heljarmikillar sveitakeppni félaganna.

Dagskráin framundan..

 Sigurvegarar sveitakeppni HSK 2010

Miðvikudagskvöldið 1.nóv verður hraðskákæfing og miðvikudagskvöldið hinn 8.des verður sveitakeppni við lið af höfuðborgarsvæðinu í Selinu, nánari upplýsingar þegar nær dregur.

Ungmennafélag Selfoss ..........

.....tekur gullið heim á Selfoss eftir árs útlegð þess í bæ Þorláks hins helga Þórhallssonar.

Hvort æðri máttarvöld hafi verið á bandi Þorlákshafnarbúa skal ósagt látið en fyrir liggur að þeir mættu galvaskir til leiks í Selið á Selfossi í kvöld staðráðnir í að verja titil þann er þeir lögðu sínar helgu hendur á fyrir ári.

Fimm aðrar sveitir skipaðar valinkunnum fulltrúum ungmennafélaga viðsvegar úr umdæmi Héraðssambandsins Skarphéðins (Njálssonar) voru einnig mættar til leiks í þeim tilgangi að hafa gullið af Þorlákshafnarbúum.

Ungmennafélagið Dímon með ofurmennið Ólaf Elí í fararbroddi sýndi sannan ungmennafélagsanda í verki og mætti með tvær sveitir til leiks.

Ungmennafélagið Baldur mætti m.a. með tvo valinkunna landsmótsmeistara og bræður innanborðs.

Laugdælir tefldu fram geysiöflugri sveit mikilla reynslubolta auk þess að hafa innanborðs Íslandsmeistara.

Selfyssingar sem voru á heimavelli urðu reyndar fyrir mikilli blóðtöku klukkustund fyrir mót þegar 1.borðs maður þeirra, skólamaðurinn og knattspyrnuhetjan mikla forfallaðist á síðustu stundu vegna anna við mat á samræmdum prófum og kjörum skólaliða í Suðurkjördæmi.

Er líða tók á mótið var ljóst að 3 sveitir kæmu til með að berjast um verðlaunasætin, þ.e. Þór, Dímon og Selfoss.

Innbyrðis viðureignir þessara félaga fóru á þennan veg:
Dímon - Þór 2,5-1,5
UMFS  - Dímon 1-3
Þór - UMFS 1,5-2,5

Dímon með 5,5
Þór með     3
UMFS með  3,5

Dímon tapaði síðan vinningum á móti neðri sveitum á meðan Selfyssingar unnu tvær viðureignir með fullu húsi sem Þór gerði einnig á móti Dímon 2.

Fyrir síðustu umferð var staðan sú að Þór leiddi mótið með 11,5 vinningum, Dímon var í öðru sæti með 11 vinninga og Selfyssingar í því þriðja með 10 vinninga.

Þór og Dímon mættust einmitt í þeirri síðustu og endaði sú viðureign 2,5-1,5 fyrir Dímon sem skelltu sér þar með uppfyrir sigurvegara síðasta árs.

Úrslit mótsins réðust síðan í viðureign Selfyssinga og Dímon 2 þar sem Selfyssingum tókst að vinna sína viðureign 4-0 og þar með hrifsa gullið úr höndum Dímoninga og félaga Þorláks hins helga.

Sigursveit UMFS skipuðu:
1.  Magnús Gunnarsson        3 v
2.  Magnús Matthíasson        5 v
3.  Þorvaldur Siggason          4
4.  Erlingur Atli Pálmarsson    2 v

Mótstafla:

Rank	Team	1	2	3	4	5	6	Pts.	MP
1	UMF Selfoss	*	1	2½	4	2½	4	14	8
2	UMF Dímon 1	3	*	2½	2	3	3	13½	9
3	UMF Þór Þorlákshöfn	1½	1½	*	3	3	4	13	6
4	UMF Baldur	0	2	1	*	2	3	8	4
5	UMF Laugdæla	1½	1	1	2	*	2	7½	2
6	UMF Dímon 2	0	1	0	1	2	*	4	1

Mun Þór Þorlákshöfn verja titilinn ?

Ungmennafélagið Þór frá Þorlákshöfn hefur titil að verja eftir að hafa unnið sveitakeppni HSK í fyrra en mun það hafa verið í fyrsta sinn frá því að elstu menn muna að Ungmennafélag Selfoss vinnur ekki titilinn.

Þór hefur á að skipa harðskeyttu liði og herma sögur að þeim hafi bæst liðsauki mikill í formi Íslandsmeistara sem hefur átt góðu gengi að fagna undanfarna mánuði eftir að hafa tekið til við skáklistina að nýju eftir nokkura ára hlé.

Útsendarar síðunnar hafa einnig haft spurnir af því að Þórarar hafi stundað þrotlausar æfingar síðustu viku og hyggist m.a. leita í smiðju 4.borðs manns Selfyssinga í byrjunarvali sínu.  Hvort það muni duga þeim til sigurs skal ósagt látið.

Sveitakeppnin hefst kl 19:30 í kvöld og eru allir sem áhuga hafa hvattir til að mæta þannig að allar sveitir verði örugglega fullskipaðar.

 

Sveitakeppni HSK ...

....fer fram miðvikudaginn 24.nóv, teflt verður í Selinu að vanda og hefst taflmennska klukkan 19:30.

Hverja sveit skipa 4 keppendur og tefldar verða 10-15 mín skákir, eftir fjölda sveita.