Mjög góð byrjun á Íslandsmótinu...

A-sveit SSON mætti b-sveit Taflfélags Reykjavíkur, fyrir fram mátti búast við erfiðri viðureign enda höfuðborgarbúar stigahærri á öllum borðum.

Adolf gaf þó tóninn og gerði jafntefli við hinn valinkunna TR-ing og hálf-Þjóðverja Richard Sveinsson.

Fljótt var ljóst að Páll Leó hafði lent í ákveðnum hremmingum eftir byrjunina og leist honum sjálfum ekki of vel á stöðuna, hann sýndi þó ótrúlegan baráttuvilja, sem hann er jú þekktur fyrir, en náði því miður ekki að leika á andstæing sinn og tapaði eftir magnaða baráttu.

Úlfhéðinn tapaði einnig, eftir mikla baráttu, sama átti við um Gunnar.

Ingimundur átti bestu skák umferðarinnar og valtaði yfir andstæðing sinn sem vissi hvorki í þennan heim né annan í viðureigninni.

Maggi Gunn barðist eins og ljón og þegar allir spekingar heimsins voru samankomnir við borðið og búnir að afskrifa hann náði hann epísku jafntefli og þar með mikilvægum hálfum vinningi.

Niðurstaðan 2-4 tap á móti sterkri sveit TR sem verður að teljast mjög gott, enda stefnan sett á að halda sér í 2.deild.

SSON-b mætti einnig geysiöflugri sveit, nánar tiltekið Taflfélagi Flateyinga, en hjá Flateyingum eru margir valinkunnir skákmenn sem margir hafa m.a teflt á alþjóðamótum með góðum árangri.

Ber þar helst að nefna belgíska skákmanninn Hérge von Rippentrop sem m.a. vann sér það til frægðar að gera jafntefli við "Selfyssinginn" Robert James Fischer í vinstrihandarfjöltefli árið 1969.

Einnig má nefna sjómanninn þekkta Magnús Kristmundsson sem var að tefla á sínu fyrsta Íslandsmóti, eftir að hafa eingöngu teflt á skilanefndarmótum með sérstaklega góðum árangri.

Nú ekki má gleyma herfylkingarforingjanum August Heinrich von Kohl, sem svo skemmtilega vill til að er náfrændi liðsstjóra SSON sem einmitt er af þýðverskum ættum, en von Kohl var í kvöld að tefla á sínu 37. Íslandsmóti skákfélaga-án þess að hafa tapað skák.

Á fjórða borði var síðan enginn annar en söngvarinn geðþekki Bubbi Morthens.

Fimmta borðið skipaði síðan Ómar Ragnmundarson, sem hefur lagt það í vana sinn að lenda flugvél sinni TF-FRÍ á húsþaki keppnisstaðar.

Á sjötta borði var síðan enginn önnur en Ásdís BragH sem þekkt varð árið 1989 þegar hún fyrst kvenna varð uppvís að því að mæta á Íslandsmót  án þess að kunna mannganginn.

úrslit: SSON 6 - TV 0

Skákfélag Selfoss og NÁGRENNIS óskar Flateyingum góðs gengis í mótinu þrátt fyrir eilitla ágjöf í upphafi þess......