Ungmennafélag Selfoss ..........

.....tekur gullið heim á Selfoss eftir árs útlegð þess í bæ Þorláks hins helga Þórhallssonar.

Hvort æðri máttarvöld hafi verið á bandi Þorlákshafnarbúa skal ósagt látið en fyrir liggur að þeir mættu galvaskir til leiks í Selið á Selfossi í kvöld staðráðnir í að verja titil þann er þeir lögðu sínar helgu hendur á fyrir ári.

Fimm aðrar sveitir skipaðar valinkunnum fulltrúum ungmennafélaga viðsvegar úr umdæmi Héraðssambandsins Skarphéðins (Njálssonar) voru einnig mættar til leiks í þeim tilgangi að hafa gullið af Þorlákshafnarbúum.

Ungmennafélagið Dímon með ofurmennið Ólaf Elí í fararbroddi sýndi sannan ungmennafélagsanda í verki og mætti með tvær sveitir til leiks.

Ungmennafélagið Baldur mætti m.a. með tvo valinkunna landsmótsmeistara og bræður innanborðs.

Laugdælir tefldu fram geysiöflugri sveit mikilla reynslubolta auk þess að hafa innanborðs Íslandsmeistara.

Selfyssingar sem voru á heimavelli urðu reyndar fyrir mikilli blóðtöku klukkustund fyrir mót þegar 1.borðs maður þeirra, skólamaðurinn og knattspyrnuhetjan mikla forfallaðist á síðustu stundu vegna anna við mat á samræmdum prófum og kjörum skólaliða í Suðurkjördæmi.

Er líða tók á mótið var ljóst að 3 sveitir kæmu til með að berjast um verðlaunasætin, þ.e. Þór, Dímon og Selfoss.

Innbyrðis viðureignir þessara félaga fóru á þennan veg:
Dímon - Þór 2,5-1,5
UMFS  - Dímon 1-3
Þór - UMFS 1,5-2,5

Dímon með 5,5
Þór með     3
UMFS með  3,5

Dímon tapaði síðan vinningum á móti neðri sveitum á meðan Selfyssingar unnu tvær viðureignir með fullu húsi sem Þór gerði einnig á móti Dímon 2.

Fyrir síðustu umferð var staðan sú að Þór leiddi mótið með 11,5 vinningum, Dímon var í öðru sæti með 11 vinninga og Selfyssingar í því þriðja með 10 vinninga.

Þór og Dímon mættust einmitt í þeirri síðustu og endaði sú viðureign 2,5-1,5 fyrir Dímon sem skelltu sér þar með uppfyrir sigurvegara síðasta árs.

Úrslit mótsins réðust síðan í viðureign Selfyssinga og Dímon 2 þar sem Selfyssingum tókst að vinna sína viðureign 4-0 og þar með hrifsa gullið úr höndum Dímoninga og félaga Þorláks hins helga.

Sigursveit UMFS skipuðu:
1.  Magnús Gunnarsson        3 v
2.  Magnús Matthíasson        5 v
3.  Þorvaldur Siggason          4
4.  Erlingur Atli Pálmarsson    2 v

Mótstafla:

Rank	Team	1	2	3	4	5	6	Pts.	MP
1	UMF Selfoss	*	1	2½	4	2½	4	14	8
2	UMF Dímon 1	3	*	2½	2	3	3	13½	9
3	UMF Þór Þorlákshöfn	1½	1½	*	3	3	4	13	6
4	UMF Baldur	0	2	1	*	2	3	8	4
5	UMF Laugdæla	1½	1	1	2	*	2	7½	2
6	UMF Dímon 2	0	1	0	1	2	*	4	1

Athugasemdir

[arnar valgeirsson, 25.11.2010 kl. 12:17]

þetta er eins og að lesa lord of the rings í bland við íslendingasögurnar. helgir menn og dímonar og héraðssambönd. bræður að berjast og blóðtökur og svo er gullið á endanum hrifsað úr höndum dímoninga  sem eru væntanlega brjálæðir. þetta er líka undarlegt lið þarna hinummegin heiðar..

[SSON - Skákfélag Selfoss og nágrennis, 25.11.2010 kl. 18:08]

Arnar þegar menn búa að söguslóðum Íslendingasagna getur það á stundum blásið síðuritara hetjubyr í brjóst og á hann því til að gleyma ekki stað en stund............en er ekki annars skákin allt þetta og meira til ?