Kæra Hróks alls fagnaðar gegn SSON og úrskurður mótsstjórnar Íslandsmóts skákfélaga

Til mótsstjórnar Íslandsmóts skákfélaga:

Kæra vegna ólömæts keppanda á Íslandsmóti skákfélaga

Í fjórðu umferð Íslandsmóts skákfélaga sem haldin var þann 2. október 2016 tefldi Skákfélag Selfoss og nágrennis fram keppanda á fimmta borði, Guðmundi Óla Ingimundarsyni, sem í keppendaskrá Skákfélags Íslands er skráður í sveit UMFL og hefur 1625 ELO stig. Fór svo að Guðmundur Óli sem tefldi á fimmta borði Skákfélags Selfoss og nágrennis hafði betur í skák sinni við Samúel Gunnarsson sem teflir fyrir Hróka alls fagnaðar. Viðureigninni lauk með 3½ - 2½ sigri Skákfélags Selfoss og nágrennis og því ljóst að hinn ólögmæti keppandi réði úrslitum í viðureigninni.

Með skírskotun til framanritaðs vænti ég þess að þið takið kæruna til skoðunnar og kannið hvort Skákfélagi Selfoss og nágrennis hafi verið heimilt að stilla sveit sinni upp með framangreindum hætti. Hafi svo ekki verið vænti ég þess að Hrókum alls fagnaðar verði dæmdur sigur í samræmi við ákvæði 21. gr. skáklaga Skáksambands Íslands.

Virðingarfyllst f.h. Hróka alls fagnaðar

Helgi Brynjarsson.

ÚRSKURÐUR MÓTSSTJÓRNAR ÍSLANDSMÓTS
SKÁKFÉLAGA 2016-2017

Ár 2016, miðvikudagur 5. október, er tekið fyrir mál nr. 1/2016; kæra Hróka alls fagnaðar vegna lögmætis keppanda með Skákfélagi Selfoss og nágrennis (SSON) í fyrri hluta Íslandsmóts skákfélaga 2016-2017. Í málinu úrskurða Sverrir Örn Björnsson, Áskell Örn Kárason og Helgi Árnason.
Framangreind kæra Hróka alls fagnaðar barst mótsstjórn mánudaginn 3. október 2016. Er kæran því fram komin innan kærufrests, sbr. 21. gr. skáklaga Skáksambands Íslands. Í kærunni kemur fram að í fjórðu umferð Íslandsmóts skákfélaga sunnudaginn 2. október 2016 hafi sveit Hróka alls fagnaðar mætt sveit SSON í þriðju deild mótsins. SSON hafi teflt fram keppanda á fimmta borði, Guðmundi Óla Ingimundarsyni (fide-kennitala 2306417), sem skráður sé í Keppendaskrá Skáksambandsins í Ungmennafélagið UMFL. Guðmundur hafi haft betur í skák sinni gegn liðsmanni Hróka alls fagnaðar og viðureigninni lokið með 3 ½ - 2 ½ sigri SSON. Sé þess því farið á leit að mótsstjórn úrskurði um hvort SSON hafi verið heimilt að stilla upp sveit sinni með þessum hætti. Hafi svo ekki verið sé þess vænst að Hrókum alls fagnaðar verði dæmdur sigur í viðureigninni í samræmi við ákvæði 21. gr. skáklaga Skáksambands Íslands.
Af hálfu mótsstjórnar var fyrirsvarsmanni SSON með vísan til 20. gr. skáklaga Skáksambands Íslands gefinn kostur á að koma á framfæri athugasemdum í tilefni af kæru Hróka alls fagnaðar. Með tölvupósti 4. október 2016 hefur fyrirsvarsmaður SSON gert grein fyrir sjónarmiðum sínum. Kemur þar fram að lengi hafi verið óljóst hvort SSON myndi takast að manna sveit til þátttöku í Íslandsmóti skákfélaga. Guðmundur Óli Ingimundarson sé skráður í UMFL sem ekki hafi verið starfrækt í nokkur ár. Hann hafi teflt með SSON í Íslandsmóti skákfélaga 2015-2016 án nokkurra athugasemda. Þar af leiðandi hafi stjórnin metið það svo að hann teldist löglegur keppandi. Guðmundur hafi verið skráður í félagið í haust og þannig lagt sitt að mörkum til að félagið gæti tekið þátt í mótinu.

Niðurstaða:
Eins og fram kemur í málavaxtalýsingu hér að framan telja Hrókar alls fagnaðar að Guðmundur Óli Ingimundarson hafi verið ólöglegur keppandi með SSON í viðureign Hróka alls fagnaðar og SSON í 4. umferð Íslandsmóts skákfélaga 2016-2017 (3. deild) þar sem Guðmundur Óli sé ekki skráður í Keppendaskrá Skáksambands Íslands sem félagsmaður SSON. Ekki er því haldið fram í málinu að aðrar ástæður en hér greinir kunni að leiða til ólögmætis Guðmundar til þátttöku í mótinu.
Samkvæmt 20. gr. skáklaga Skáksambands Íslands skulu keppendur í Íslandsmóti skákfélaga vera skráðir í Keppendaskrá Skáksambandsins sem félagsmenn þeirra félaga sem þeir tefla fyrir. Í 1. mgr. 19. gr. skáklaganna kemur fram að aðeins þeir sem eru í Keppendaskrá SÍ teljist löglegir með viðkomandi félagi í Íslandsmóti skákfélaga (fyrri og seinni hluta). Þó eru þeir skákmenn sem eru án skákstiga og án félags undanþegnir því að þurfa að vera í Keppendaskránni. Fyrir liggur að Guðmundur Óli Ingimundarson er skráður félagsmaður Ungmennafélagsins UMFL í Keppendaskrá og hefur ekki verið sýnt fram á að tilkynning um félagaskipti vegna hans hafi borist Skáksambandi Íslands innan tilskilins frests samkvæmt 2. mgr. 19. gr. skáklaga. Úrlausn málsins þykir því velta á því hvort fyrrgreind undantekning vegna stiga- og félagalausra skákmanna eigi við um Guðmund Óla.
Í 3. mgr. 4. gr. skáklaga Skáksambands Íslands kemur fram að við val á keppendum til þátttöku í landsliðsflokki Skákþings Íslands samkvæmt 3. og 4. tölul. 1. mgr. sömu greinar skuli stjórn Skáksambandsins hafa til hliðsjónar alþjóðleg skákstig. Skýra verður ákvæði 1. mgr. 19. gr. skáklaga til samræmis við 3. mgr. 4. gr. laganna að þessu leyti. Verður því að miða við að skákmaður teljist „án skákstiga“ í skilningi 1. mgr. 19. gr. laganna sé hann ekki skráður með alþjóðleg skákstig á stigalista Alþjóðaskáksambandsins (FIDE). Guðmundur Óli Ingimundarson telst því uppfylla þetta skilyrði laganna fyrir undanþágu frá keppendaskrá, enda er hann ekki skráður með alþjóðleg skákstig. Eins og fram er komið er Guðmundur Óli engu að síður skráður í keppendaskrá, þ.e. í Ungmennafélagið UMFL. Samkvæmt upplýsingum á vef Skáksambands Íslands er UMFL ekki aðili að Skáksambandinu og hefur því ekki rétt til þátttöku í Íslandsmóti skákfélaga 2016-2017, sbr. 16. gr. skáklaga. Verður því að leggja til grundvallar að Guðmundur Óli sé „án félags“ í skilningi 1. mgr. 19. gr. skáklaganna, enda koma ekki til álita önnur félög í því sambandi en félög sem eiga þátttökurétt í Íslandsmóti skákfélaga.
Með vísan til þess, sem hér að framan greinir, verður að telja að Guðmundur Óli Ingimundarson uppfylli skilyrði fyrir undanþágu frá skráningu í keppendaskrá. Honum var því heimilt að tefla fyrir sitt nýja félag, SSON, í 4. umferð Íslandsmóts skákfélaga 2016-2017 hvað sem leið fyrrnefndri skráningu í UMFL í keppendaskrá. Er kröfu Hróka alls fagnaðar því hafnað.

Ú r s k u r ð a r o r ð :
Kröfu Hróka alls fagnaðar í máli þessu er hafnað.

Um málskot:
Úrskurði þessum má skjóta til Dómstóls SÍ. Kærufrestur er þrír sólarhringar frá því að úrskurður mótsstjórnar lá fyrir.