Sólskin að mestu en stöku él !

Óhætt er að segja að skipst hafi á skin og skúrir í gengi félagsmanna okkar á Íslandsmótinu liðna helgi.

A-sveitin sem tefldi í 3.deild varð fyrir mikilli blóðtöku þegar ljóst var að fjórir stigahæstu menn félagsins forfölluðust allir.  Þetta hafði það í för með sér að færa þurfti skákmenn sem undir eðlilegum kringumstæðum hefðu teflt í B-sveitinni í A-sveitina.  Ætla hefði mátt að þessi veiking A-sveitarinnar hafi skilað sér í færri vinningum og sigrum en það reyndist svo sannarlega ekki raunin og er óhætt að fullyrða að þeir sem til voru kallaðir hafi skilað sínu vel og miklu meira en það.

A-sveitin tefldi fjórar viðureignir, vann tvær, gerði eitt jafntefli og tapaði einni og er í 4.-7.sæti af 16 sveitum. 

Liðsstjóra var vandi á höndum þegar hann raðaði í sveitir fyrir mótið enda með nokkuð góðu móti hægt að segja að 6-8 félagsmenn séu mjög áþekkir að styrkleika.  Magnús Gunnarsson tefldi reyndar eina skák og það gerði Ingimundur einnig í fyrstu umferð en þeir urðu síðan frá að hverfa og var því ljóst að Adolf Petersen myndi leiða sveitina með Úlfhéðinn, Erling J, Ingu, Ingvar Örn og Grantas sér við hlið.

Óhætt er að segja að árangur þeirra hafi verið framar vonum, sérstaklega voru 4 neðstu borðin að skila inn mikilvægum vinningum og gerðu nákvæmlega það sem þau áttu að gera á meðan tvö efstu borðin þurftu oft á tíðum að kljást við gríðarlega sterka andstæðinga og gerðu mjög vel í því að halda sjó meðan neðri borðin drógu inn aflann.

Frábær árangur hjá A-sveitinni og allt opið fyrir seinni hluta mótsins sem fram fer á Selfossi við ofanverða Góu á næsta ári.

B-sveitin leið augljóslega fyrir það að miss sterka skákmenn yfir í A-sveitina og náði aldrei almennilega áttum sökum þess, sem og þess að fullmargar innáskiptingar komu í veg fyrir stöðugleika, aukinheldur voru nokkrir að tefla á sínu fyrsta Íslandsmóti og ugglaust eilítill sviðsskrekkur í þeim.  Allir náðu þeir sér í mikilvæga keppnisreynslu og góða sigra einnig sem munu ylja þeim um hjartarætur þegar vetur konungur leggur hramma sína yfir Flóann.

Erfitt er að bera saman árangur félagsmanna þar sem þeir tefldu jú við missterka skákmenn en þó er vert að geta stórkostlegs árangurs okkar kæra Grantas sem átti gott spjall við Anatoly Karpov heimsmeistara fyrir mótið, ekki fylgir sögunni hvort Karpov muni skák þeirra sem tefld var í bæ við Úralfjöll á 1100 ára afmæli lýðveldisins íslenska, en einhverjum krafti hefur heimsmeistarinn blásið Grantas í brjóst því hann vann alla andstæðinga sína, auðveldlega !

Liðsstjóri þakkar öllum þeim sem tefldu fyrir félagið og óskar þeim góðra skákstunda á komandi mánuðum.

Allar nánari upplýsingar eru hér:http://chess-results.com/tnr57495.aspx?lan=1