Páskafullorðinsmót SSON !...uppfært og aftur..uppfært....og aftur....

 

fer fram miðvikudagskvöldið 4.apríl kl 19:30.

Staðsetning mótsins liggur ekki enn fyrir en verður gefin út með tilkynningu í öllum helstu fjölmiðlum þegar nær dregur.

Teflt verður samkvæmt MM* stigakerfinu sem verður útskýrt nánar á keppnisstað.

Veitingar í formi göróttra drykkja og flatbaka í boði stjórnar.

Félagsmenn barna-og unglingadeildar vinsamlegast beðnir um að koma með skriflegt leyfi forráðamanna.

Verðlaun fyrir 8 efstu sætin !

Allir félagsmenn sem aðrir velkomnir.

  Fyrir hönd stjórnar SSON Magnús M formaður.

* Stigakerfi MM © :
1. Við upphaf skákar tilkynnir sá er hvítan lit hefur hve mikinn tíma hann hyggst nota í skákina, 1-5 mínútur.  Síðan gerir sá er svart hefur slíkt hið sama.
2. Vinnist skák með tímann 1 mínúta fást 5 stig, vinnist skák með tímann 2 mínútur fást 4 stig og svo koll af kolli.
3. Jafntefli gefur alltaf 1 stig.
4. kynnt á skákstað
5. kynnt á skákstað

Teflt verður á heimili formanns, mæting kl 19:30 stundvíslega, glæsileg verðlaun!

Mættir átta keppendur til leiks, þannig að hið eina sem ljóst var, var að allir myndu vinna til verðlauna.
Keppendur fóru af stað með mismunandi takík, formaðurinn setti línuna og var svo til alltaf með tvær mínútur á klukkunni, sem reyndist honum vel, framan af, enda leiddi hann mótið eftir 14 umferðir af 21, nokkuð örugglega. 

Aðrir töldu hyggilegt að nota meiri tíma og treysta á sigur með hugsun, sem í sjálfu sér var ágætis taktík, en skilaði ekki mörgum stigum.  Ingimundur og Ingvar beittu svokallaðri aðlagaðri taktík, með 2-4 á klukkunni, allt eftir andstæðingi, þetta reyndist þeim nokkuð vel, en kannski full flókið kerfi til lengdar.

Erlingur J, meðlimur barna-og unglingadeildar, var sá eini þeirrar deildar sem mætti með skriflegt leyfi foreldra vegna þátttöku, en ekki vegna aðgangs að helstu veitingum, sem skilaði honum allmörgum vinningum, sérstaklega þegar á mótið leið.

Úlfhéðinn hugsaði einfaldlega allt og mikið, hann helsti akkilesarhæll í hraðskák.

Valdi hefur verið að stunda skákæfingar uppi á Skaga, sem hefur því miður ekki hjálpað honum.

Inga stóð sig vel miðað við aðstæður en er að eyða allt of miklum tíma í að finna besta leikinn, þetta verður hún að laga, ætli hún sér að ná langt.

Grantas, fátt um hann að segja, hann kann bara stundum ekki að spila skák, hann kom þó með nokkra lítra af Kjörís, sem var góður leikur.

Nú mótið endaði þannig að Ingimundur sigraði með 41 stig, Ingvar varð annar með 39 stig, Magnús þriðji með 38 stig og Erlingur fjórði með 37 stig, Grantas 32, Úlli 29, Inga 25 og Valdi 8.

Allir fóru heim með vegleg verðlaun í formi Camus, rauðvíns eða Corona.......

Birgisbarnamót SSON

hið árlega Birgisbarnamót SSON fer fram í Selinu miðvikudagskvöldið 28.mars kl 19:30.

Mótið er nú haldið í 8 skipti til heiðurs Ingibjörgu Eddu Birgisdóttur og Ingvari Erni Birgissyni en þau hafa um árabil verið kjölfestan í starfi félagsins.

Hvetjum félagsmenn til að mæta og taka þátt í skemmtilegu móti í góðra vina hópi.

Suðurlandsmótið !

Unnið er samkvæmt þeirri áætlun að mótið fari fram daganna 20-22.apríl.  Endanleg ákvörðun um dagsetningu verður tekin mjög fljótlega, líklegt verður að telja að þessi verði ofan á enda tekin í góðri trú og í samráði við góðan hlut væntanlegra keppenda.

Mótsstaður verður Selfoss.

Mótið að vanda öllum opið, en einungis þeir sem lögheimili eiga í Suðurkjördæmi geta orðið Suðurlandsmeistarar.

Mótið verður með hefðbundnu sniði þ.e. 4 atskákir og 3 kappskákir.  Mótið hefst á föstudagskvöldi með 3-4 atskákum, laugardagur 2 kappskákir (og ein atskák ef tefldar eru 3 slíkar á föstudeginum) og síðan síðasta umferð á sunnudagsmorgni með kappskák.

Hátíðinni lýkur síðan venju samkvæmt með Hraðskákmeistaramóti Suðurlands kl 15 á sunnudeginum.

Páll Leó..

enn sigurvegari hraðskákmóts, nú með 11 vinninga af mögulegum 12, Ingvar Örn náði að vinna hann, aðrir ekki.

Seigur er hann, sennilega búinn að vinna öll mót sem hann hefur tekið  þátt í síðan hann kom aftur á Selfoss fyrir 2-3 mánuðum.

Lokastaða:

1.  Páll Leó        11
2.  Magnús M      9
3.  Ingvar Örn     7,5
4.  Ingimundur     6
5.  Úlfhéðinn        4
6.  Grantas          3,5
7.  Inga                2

Marsmótið...

 

árlega fer fram annað kvöld miðvikudaginn 21.mars venju samkvæmt.  Tefldar verða 5 mínútna hraðskákir að lágmarki 10 umferðir.

Formaður mun einnig viðra hugmyndir sínar um Suðurlandsmót í skák sem fram ætti að fara fljótlega.

Reykjavíkurmótið!

Þá er Reykjavíkurmótinu lokið og telst árangur keppenda okkar nokkuð góður.

Páll Leó var með 4,5 vinninga og endaði í 105. sæti (var 108.stigahæsti keppandinn)

Ingvar Örn var með 4 vinninga og endar í 123.sæti (var 163.stigahæsti keppandinn)

Inga Birgisdóttir var með 3,5 vinninga og endar í 151.sæti (var 181.stigahæsti keppandinn)

Erlingur Atli var með 1,5 vinninga og endar í 194. sæti (var 189.stigahæsti keppandinn)

   Í kvöld miðvikudagskvöld hittumst við í Selinu, berum saman bækur okkar varðandi Íslandsmót skákfélaga, Reykjavíkurmótið og teflum að sjálfsögðu.

 

Ingvar Örn....

að standa sig vel um helgina í Hörpu ! 

Þegar 7 umferðum er lokið hefur hann hlotið 4 vinninga, í dag fóru fram tvær umferðir, í þeirri fyrri vann hann landsliðskonuna Hallgerði Helgu Þorsteinsdóttur (1959) og í þeirri síðari vann hann Þjóðverjann Wolfgang Scholzen (2127), sannarlega frábær dagur hjá Ingvari (1767).

Í gær mættust félagar okkar þau Inga og Páll Leó í innbyrðis viðureign, kannski ekki endilega draumadráttur í móti með 200 keppendum að mæta samfélagsmanni sínum, en hvað um það Páll Leó vann nokkuð örugglega.

Erlingur Atli (1405) sem er að tefla á sínu fyrsta stórmóti náði frábæru jafntefli í gær á móti Norðmanninum Thomas Wasenius (1612), sannarlega flott hjá honum.

Að loknum 7 umferðum af 9 hefur Ingvar 4 vinninga, Páll Leó hefur 3, Inga 2 og Erlingur Atli 1,5.

Efstur á mótinu er Ítalinn ungi, sjöundi stigahæsti skákmaður heims Fabiano Caruana (2767) en hann er með 6,5 vinninga.

Nánari upplýsingar um mótið: http://chess-results.com/tnr54645.aspx?lan=1

og hér einnig: http://www.skak.blog.is/blog/skak/

sverðin slíðruð..

í tveimur skákum af fjórum félagsmanna okkar og jafntefli staðreynd í þeim skákum.  Engin stutt jafntefli heldur barist á báðum vígstöðvum.

Erlingur Atli (1405) tapaði því miður sinni skák eftir mikla baráttu, hann er að tefla á sínu fyrsta stórmóti og ekki hægt að ætlast til mikils af honum, hann á nú eftir að vinna skák í mótinu, svo mikið er víst !

Ingvar Örn með frábæran sigur í dag og er efstur okkar SSON liða !

Formaður kíkti á skákstað í dag og ekki er annað hægt en að hrósa mótshöldurum fyrir frábærar aðstæður. 

200 keppendur þ.m.t. Hou Yifan (2639) heimsmeistari kvenna auk Fabiano Caruana (2767) sem er 7.stigahæsti skákmaður heims

Páll Leó (2057) - Eric de Winter frá Hollandi (1852) 0,5-0,5

Tiemu Miettinen frá Finnlandi (2012) - Ingvar Örn Birgisson (1767) 0-1

Siguringi Sigurjónsson (1944) - Inga Birigisdóttir (1564) 0,5-0,5

Að loknum 4 umferðum af 9 er Ingvar með 2 vinninga, Páll Leó og Inga eru með 1,5.

 

Systkinin með sigra !

Systkinin Inga og Ingvar Örn spýttu svo sannarlega í lófa á Reykjavíkurmótinu í dag og lönduðu bæði góðum sigrum.  Páll Leó varð (2057) að játa sig sigraðan á móti Ingvari Þór Jóhannessyni (2331).

Inga(1564) vann góðan sigur á móti Ingver Gundersen (1814) frá Svíþjóð en Ingvar vann Sóleyju Lind Pálsdóttur (1323).  Erlingur Atli tapaði því miður en teflir á morgun við anstæðing Ingu frá í dag.

Inga, Ingvar og Páll hafa öll einn vinning að loknum þremur umferðum.  Fjórða umferð fer fram á morgun

Þungur róður..

hjá keppendum okkar á Reykjavíkurmótinu, í Reykjavík.

Þegar fjórmenningarnir okkar hafa allir teflt tvær skákir er niðurstaðan einn vinningur í hús.  Páll Leó vann góðan sigur á Sigurlaugu Regínu formanni Taflfélags Reykjavíkur.  Inga, Ingvar og Erlingur tefldu öll við mun stigahærri andstæðinga í fyrstu tveimur umferðunum og töpuðu sínum skákum.

Við vitum að þau munu spýta í lófa og koma sterk til baka á morgun og sendum þeim okkar bestu baráttukveðjur !