Reykjavíkurmótið !

Fjórir félagsmenn taka nú þátt í Reykjavíkurmótinu í skák sem fram fer í Hörpunni.  Páll Leó Jónsson (2043), Ingvar Örn  Birgisson (1767), Ingibjörg Edda Birgisdóttir (1564) og Erlingur Atli Pálmarsson (1405).

Keppendur á mótinu eru 197 og þar á meðal sjöundi stigahæsti skákmaður heims hinn kornungi Ítali Fabiano Caruana (2767) og heimsmeistari kvenna Hou Yifan (2639)

Félagar okkar fá allir mjög erfiða andstæðinga í fyrstu umferð en Páll Leó þó þann sýnu erfiðasta eða Yuri Kuzubov en hann er með 2615 skákstig.

Vegna mótsins fellur niður skákæfing miðvikudaginn 7.mars.

Allar upplýsingar um mótið má nálgast hér að neðan:

Heimasíða mótsins: http://skaksamband.is/?c=webpage&id=490/ 

Upplýsingar um paranir og úrslit: http://chess-results.com/tnr54645.aspx?lan=1

Upplýsingasíða um skák á Íslandi: http://www.skak.blog.is/blog/skak/ 

 

Vel heppnað Íslandsmót !

Almenn ánægja með framkvæmd okkar á Íslandsmóti skákfélaga.  Formaður hefur rætt við fjölda skákmanna sem voru á Selfossi um helgina og voru þeir almennt mjög ánægðir, sérstaklega hefur verið tekið fram hve húsnæðið hafi vel hentað til skákmótahalds, einnig var almenn ánægja með veitingasöluna og enginn sem virðist hafa saknað hinna sígildu baunasamloka.  Auðvitað voru einstaka smávægileg atriði sem mátt hefðu fara betur en þau falla í skuggann af vel heppnaðri skákhátíð.

Sveitir Selfoss geta vel við sinn árangur unað þótt vissulega sé nokkuð svekkjandi að vera hálfum vinningi frá því að fara upp í aðra deild, en bronsið í þeirri þriðju staðreynd og 13.sæti hjá B sveitinni í fjórðu deild.  Því miður réðu mikil forföll okkar sterkustu skákmanna í fyrri hlutanum úrslitum. 

Margir félagsmenn áttu frábært mót, Páll Leó sem tefldi á 1.borði a sveita með 2,5 af 3, bræðurnir Úlfhéðinn og Ingimundur stóðu sig einnig sérstaklega vel sem og syskinin Inga og Ingvar Örn Birgisbörn. Erlingur Jensson átti einnig mjög góða spretti sem og Grantas.  Maggi Garðars skilaði svo sínu á heimavelli með fullu húsi. 

Lokahóf og verðlaunaafhending tókst með miklum ágætum í Hvíta húsinu þar sem sumir skemmtu sér fram eftir nóttu við unaðsfagra tóna GusGus.

 

Formaður vill þakka öllum þeim sem komu að undirbúningi mótsins, þeim sem aðstoðuðu við að gera keppnissalinn skákhæfan, Örlygi skólameistara og Adda húsverði, einnig ber að þakka 4.flokks stelpunum í handbolta sem ráku veitingasöluna af miklum myndarskap og síðast en ekki síst þeim Eyþóri Arnalds og Kjartani Björnssyni sem frá fyrsta degi studdu hugmyndir okkar af ráðum og dáð.

    MM

Hátíð í vændum!

Íslandsmót skákfélaga á Selfossi 2. og 3.mars

Um helgina fer fram Íslandsmót skákfélaga á Selfossi.

Íslandsmótið er stærsti skákviðburður sem fram fer á hverju ári á Íslandi , í ár eru keppendur nálægt 370.

 Mótið fer fram í 4 deildum, í 1. og 2. deild eru 8 sveitir,  í þriðju deild eru 16 sveitir.  Fjórða deildin er opin deild þar sem nýjar sveitir eða skákfélög hefja leik, í ár eru 22 sveitir skráðar til leiks í fjórðu deild.

Hverja sveit skipa sex keppendur, utan sveita sem eru í efstu deild þar eru þeir átta.

Íslandsmótið fer fram með þeim hætti að tefldar eru samtals 7 umferðir, fjórum er þegar lokið, þær fóru fram á haustmánuðum.  Á Selfossi verða tefldar síðustu 3 umferðirnar, umferðirnar sem skipta öllu máli, þar sem úrslitin ráðast.

Mótið sækja allir bestu skákmenn Íslendinga, stórmeistarar okkar verða allir á staðnum, landsliðsmenn, unglingalandsliðsfólk, allir efnilegustu skákkrakkar landsins.  Mótið er hátíð þar sem aldur er afstæður enda eru keppendur á öllum aldri, allt frá 7 ára og langleiðina uppúr.

Stærstu og sterkustu skákfélögin nýta sér ekki eingöngu krafta íslenskra skáksnillinga heldur leita einnig út fyrir landsteina að liðsstyrkingum og má ætla að erlendir stórmeistarar sem taka þátt séu á bilinu 10-15, eins og gefur að skilja er sú tala ekki á hreinu enda reyna félög oft að halda liðsuppstillingu sinni leyndri fram að móti.  Meðal keppenda að utan má telja Ivan Sokolov sem er einn allra sterkasti skákmaður heimsins og mikill Íslandsvinur sem margoft hefur teflt hér á landi og m.a. unnið Reykajvíkurmótið í skák í tvígang, en það mót hefst einmitt á miðvikudag og mun fara fram í Hörpunni í Reykjavík.

Ætla má að baráttan í efstu deild komi til með að standa á milli
Reykjavíkurfélaganna Taflfélagsins Hellis, Taflfélags Reykjavíkur, aukTaflfélags Bolungarvíkur og Taflfélags Vestmannaeyja.

Í annari deild mun baráttan líklega standa á milli Goðans frá Húsavík, Víkingaklúbssins og KR.

Þriðja deildin er gríðarlega jöfn, þar eru Selfyssingar með aðra af tveimur sveitum sínum og gera sér nokkrar vonir um að fara upp í þá aðra en tvær sveitir fara upp og tvær niður um deild.

Í fjórðu deild er viðbúið að baráttan komi til með að standa á milli Skákfélags Íslands, Skákfélagsins Máta og Austfirðinga.  Hér vonast Selfyssingar einnig eftir góðum árangri b sveitar sinnar.

Ljóst að mikil og einstök skákhátíð er í vændum og er óhætt að hvetja Selfyssinga og nærsveitunga að koma í FSU um helgina og berja alla okkar bestu skákmenn augum og verða jafnframt vitni að þeirri grósku sem einkennir íslenskt skáklíf.

                          MM

Liðsskipan..

Svona verða sveitir okkar skipaðar föstudagskvöldið kl 20:00.

A-sveit

1. Páll Leó

2. Gunnar F

3. Björgvin

4. Ingimundur

5. Úlfhéðinn

6. Erlingur J.

 

B-sveit

1. Inga

2. Ingvar Örn

3. Grantas

4. Magnús Garð

5. Erlingur Atli

6. Stefán B

Upplýsingar um mótið: http://chess-results.com/tnr57495.aspx?lan=1

Liðsskipan sveita SSON....

á Íslandsmóti skákfélaga um helgina mun liggja fyrir síðar í kvöld.  Liðsstjóra er nokkur  vandi á höndum þar sem framboð félagsmanna sem vilja tefla er meira en eftirspurnin.  Þetta er náttúrulega svokallað lúxusvandamál sem verður leyst auðveldlega. 

hraðskák og undirbúningur..........

nú ætla allir sér að mæta í Selið þar sem tefld verður hraðskák af mikilli list, auk þess verður spjallað mikið og spekúlerað um komandi átök á Íslandsmóti skákfélaga....

Íslandsmót skákfélaga..uppfært!

Eins og alkunna er fer seinni hluti Íslandsmóts skákfélaga fram á Selfossi næstu helgi.

Við SSON liðar höfum á að skipa tveimur sveitum, einni í þriðju deild og annarri í þeirri fjórðu.

Liðsstjóri hefur undanfarna daga verið með opinn síma og tekið á móti beiðnum félagsmanna um að tefla fyrir félagið.

Eftirtaldir hafa lýst sig reiðubúna að tefla innan sviga hvaða skákir þeir geta teflt , liðsstjóri mun síðan gefa upp hverjir skipa hvaða sveitir og hvaða borð þegar nær dregur móti og fyrir liggur hverjir fleiri gefa kost á sér.

Þrír félagsmenn bæst við lista þeirra sem vilja tefla sem er gott mál !  Liðsstjóri mun væntanlega ekki gefa út liðin fyrr en á fimmtudag!

1.   Páll Leó Jónsson                                     2043
2.  Gunnar Finnlaugsson                               2034
3.  Guðbjörn Sigurmundsson  (5.og 7.)     1866
4.  Adolf Pedersen                   (6.og7.)      1815
5.   Ingimundur Sigurmundsson   (5.og7.)     1791
6.   Ingvar Örn Birgisson                               1767
7.   Úlfhéðinn Sigurmundsson      (5.og7.)      1770
8.   Erlingur Jensson                                     1750
9.   Óskar Haraldsson                                   1730
10.   Grantas Grigoranas                              1729
11.  Árni Guðbjörnsson                              1727
12.   Magnús Matthíasson                             1616
13.  Inga Birgisdóttir                                     1564
14.  Stefán Bjarnarson                                  1535
15.  Magnús Garðarsson                               1485
16.  Erlingur Atli Pálmarsson                          1405
17.  Arnar Erlendsson

  
  
 

Páll Leó...

 

er sigurvegari Öskudagshraðskákmóts SSON 2012.  Hann fékk 14,5 vinninga í 18 skákum, annar varð Ingvar Örn og þriðji Magnús Matt.

Tekin hefur verið upp sá siður að félagsmenn skiptast á að koma með verðlaun fyrir mót.  Í kvöld var það formaðurinn sem sá um verðlaunin.  Páll Leó gekk út með bókina 60 eftirminnilegustu skákir Fischer, Ingvar Örn fékk litla vodkaflösku og formaður fór aftur heim með forláta penna.

 

 

Lokastaðan:

1.  Páll Leó           14,5
2.  Ingvar Örn      13,5
3.  Magnús Matt   13
4.  Grantas          12,5
5.  Inga                10,5
6.  Erlingur Jens    9,5
7. Úlfhéðinn          9
8.  Magnús Garð   4
9.  Erlingur Atli      3,5
10 Arnar              0

Öskudagshraðskákmót SSON !

 

Miðvikudagskvöldið 22.feb kl 19:30 fer fram árlegt Öskudagshraðskákmót félagsins.  Tefldar verða 5 mínútna skákir að lágmarki 10 umferðir. 

Tekin verður upp sú nýbreytni á hraðskákmótum félagsins að einn þátttakandi sér um að útvega verðlaun fyrir fyrsta sætið, að þessu sinni mun formaður félagsins ríða á vaðið og veita óvænt verðlaun úr bókaskáp sínum eða vínskáp.

Auk mótsins verður farið yfir komandi átök á Íslandsmóti skákfélaga sem fram fer á Selfossi aðra helgi.

Að loknu móti verður síðan komið til móts við yngri félagsmenn og verður kötturinn sleginn úr tunnunni, venju samkvæmt á slaginu 23:00.

Þorraatskákmótið !

Síðustu 3 umferðir mótsins fara fram nk. miðvikudag kl 19:30.

Allar upplýsingar um mótið, paranir, stöðu og fleira á chess results:

http://chess-results.com/tnr65948.aspx?lan=1