SSON - Skákfélag Selfoss og nágrennis

Dómstóll SÍ
Reykjavík 7. október 2016

Efni: Áfrýjun til dómstóls Skáksambands Íslands í máli nr. 1/2016.
1. Hér með áfrýja ég til Dómstóls SÍ fyrir hönd sóknaraðila, Hróka alls fagnaðar, úrskurði mótsstjórnar Íslandsmóts skákfélaga frá 5. október s.l. í máli nr. 1/2016: Hrókar alls fagnaðar gegn Skákfélagi Selfoss og nágrennis (eftirleiðis SSON). Um áfrýjunarheimild vísar sóknaraðili til 2. gr. skáklaga Skáksambands Íslands. Aðilar máls eru Hrókar alls fagnaðar og SSON.
1 Hinn áfrýjaði úrskurður:
2. Með úrskurðinum voru kröfum Hróka alls fagnaðar um að þeim yrði dæmdur sigur í viðureign sinni við SSON hafnað og ekki fallist á að SSON hafi verið óheimilt að stilla liði sínu upp með þeim hætti sem þeir gerðu í viðureign sinni við Hróka alls fagnaðar.
2 Kröfur fyrir dómstóli SÍ:
3. Sóknaraðili gerir fyrir Dómstóli SÍ þær kröfur að hinum áfrýjaða úrskurði verði snúið og fallist verði á kröfur Hróka alls fagnaðar um að þeim verði dæmdur sigur í viðureign þeirra og SSON.
3 Ástæður sem áfrýjun er reist á:
3.1 Þær meginreglur sem gilda um félagsskipti og skráningu keppenda á Íslandsmóti skáksveita:
4. Að meginstefnu til skulu keppendur á Íslandsmóti skáksveita vera skráðir í keppendaskrá sem félagsmenn þeirra taflfélaga sem þeir tefla fyrir, sbr. 1. mgr. 19. gr. og 20. gr. skáklaga SÍ. Um félagsskipti segir í 2. mgr. 19. gr. að tilkynning skákmanns skal hafa verið send 20 dögum fyrir upphaf fyrri hluta Íslandsmóts skákfélaga ella getur hann ekki teflt fyrir sitt nýja félag í því. Ljóst er að Guðmundur Óli Ingimundarson var ekki skráður í SSON í viðureign Hróka alls fagnaðar og SSON í 4. umferð Íslandsmóts skákfélaga 2016-2017 (3. deild). Þvert á móti var Guðmundur Óli skráður í Keppendaskrá Skáksambands Íslands sem félagsmaður UMFL.
5. Í úrskurði mótsstjórnar Íslandsmóts skákfélaga 2016-2017 er því slegið föstu að umræddur keppandi hafi ekki sent inn tilkynningu um félagaskipti til Skáksambandi Íslands innan tilskilins frests samkvæmt 2. mgr. 19. gr. skáklaga og því velti úrlausn málsins á túlkun á undanþáguákvæði vegna stiga- og félagalausra skákmanna eigi við um Guðmund Óla.
6. Að mati sóknaraðili á hvorugt þessara skilyrða við um Guðmund Óla en bæði skilyrðin þurfa að vera fyrir hendi svo fallast eigi á undanþáguna.
3.2 Markmið og tilgangur með undantekningarákvæði 1. mgr. 19. gr. skáklaga:
7. Almennt ber við lögskýringu að skýra undanþáguákvæði þröngt. Þá er almennt viðurkennt að rétt sé að skýra reglur og lagaákvæði í samræmi við markmið þess. Mikilvægasta heimildin um markmið lagaákvæðis er texti þess en ljóst má vera af lestri ákvæðisins að því er ætlað að einfalda liðum að stilla upp fullri sveit á keppnisdegi með því að kalla til stiga- og félagslausa skákmenn með stuttum fyrirvara. Kemur slíkt fyrirkomulag í veg fyrir að félag neyðist til þess að gefa skákir en þau skilyrði sem sett eru fyrir undanþágunni miðast að því að tryggja að sterkum skákmönnum verði ekki skyndilega stillt upp án þess að hafa fengið í gegn félagsskipti. Orðalag undanþágunnar sem kemur fram í 1. mgr. 19. gr. laganna gefur til kynna að hún eigi við um þá skákmenn sem ekki búa yfir nægum styrkleika til að öðlast skákstig.
8. Samkvæmt heimasíðu skáksambands Íslands kemur fram að við útreikning á íslenskum skákstigum sé í grundvallaratriðum beitt þeim aðferðum sem kennd við stærðfræðingin Arpad E. Elo, en það er sömu aðferðir og lagðar eru til grundvallar við útreikning á alþjóðlegum stigum. Því er unnt að ganga út frá því að íslensk skákstig sýni fram á raunverulegan styrk skákmanna með sama hætti og alþjóðleg skákstig gera. Samkvæmt íslenskum skákstigum hefur Guðmundur Óli styrkleika upp á 1625 stig og telja verður að áðurnefnd undantekningarregla hafi ekki verið sett með jafn sterka skákmenn og hann í huga, heldur hafi reglan átt að gagnast þeim skákmönnum sem ekki eru nógu sterkir til að öðlast skákstig reiknuð á grundvelli aðferða Arpad E. Elo.
9. Í þessu samhengi ber einnig að hafa í huga að SSON er eina félagið sem ekki hefur skilað inn styrkleikaröðuðum lista í samræmi við 20. gr. skáklaga. Var því ómögulegt fyrir utanaðkomandi að gera sér grein fyrir því hvernig lið SSON yrði skipað í deildarkeppninni. Fór það og svo að menn sem ekki voru skráðir í sveit SSON í keppendaskrá SÍ tefldu fyrir félagið.
3.3 Hugtakið félag í skilningi 1. mgr. 19. gr. skáklaga:
10. Sóknaraðili gerir athugasemdir við röksemdir í úrskurði móttstjórnar þess efnis að Guðmundur Óli hafi verið án félags. Eins og fram kemur í úrskurði mótsstjórnar er Guðmundur Óli skráður félagsmaður í UMFL í keppendaskrá SÍ. Af því leiðir að hann getur ekki talist félagslaus í skilningi undantekningarákvæðis sem ber að skýra þröngt. Leggja ber keppendaskrá SÍ til grundvallar í þessum efnum. Getur engu um það breytt þó svo að UMFL hafi ekki tekið þátt í Íslandsmóti skákfélaga síðastliðin ár enda ekkert því til fyrirstöðu að liðið taki aftur þátt í Íslandsmótinu. Fari svo að UMFL skrái sig til þátttöku á næsta ári þyrfti Guðmundur Óli ekki á félagsskiptum að halda þar sem hann er þegar skráður í félagið.
11. Niðurstaða mótsstjórnar leiðir enn fremur til þeirrar óeðlilegu niðurstöðu að unnt sé að fara á sveig við ákvæði um félagsskipti og sameiningu félaga á grundvelli undanþáguákvæðis.
12. Þá ber ennfremur að hafa í huga að lið UMFL hefur ekki verið leyst upp eða það sameinað öðru liði. Í keppendaskrá SÍ eru 13 liðsmenn skráðir í félagið og hefur félagið marg oft tekið þátt í Íslandsmóti skákfélaga.
13. Þegar allt ofangreint er tekið saman, verður ekki séð hvernig liðsmaður, sem skráður er í keppendaskrá Skáksambands Íslands sem meðlimur í félagi, getur talist „án félags“, hvort sem það félag er skráð til keppni í Íslandsmóti skákfélaga eða ekki.
3.4 Hugtakið skákstig í skilningi 1. mgr. 19. gr. skáklaga:
14. Jafnan er gengið út frá því að túlka beri hugtök í samræmi við það sem telst hin eðlilega merking hugtakanna. Ef víkja á frá þeirri merkingu sem ræðst af orðanna hljóðan þurfa að tilkoma sérstök rök fyrir slíkri niðurstöðu. Hér snýst ágreiningurinn um merkingu hugtaksins skákstig í ákvæði 1. mgr. 19. gr. skáklaga. Ljóst má vera að einstaklingur sem hefur íslensk skákstig telst almennt ekki án stiga. Því þurfa einhver sérstök rök að mæla með því að vikið sé frá þeirri niðurstöðu sem leiðir af almennri málvenju. Hér verður rökstutt að engin slík knýjandi rök séu fyrir hendi.
15. Eins og að framan greinir ber að skýra undanþágur þröngt. Mótsstjórn beitir aftur á móti rýmkandi lögskýringu sem gerir það að verkum að einstaklingar með íslensk skákstig teljist stigalausir í skilningi ákvæðisins.
16. Við túlkun lagaákvæða ber að leggja til grundvallar heildstætt mat á samhengi lagaákvæðis. Í því felst að rétt getur verið að túlka lagaákvæði til samræmis við önnur ákvæði í sama lagabálki og er það nefnt innri samræmisskýring. Við beitingu samræmisskýringar er mikilvægt að skýra orð og hugtök í samræmi við önnur ákvæði sama lagabálks. Mótsstjórn beitir slíkri lögskýringu og kemst að þeirri niðurstöðu að rétt sé að skýra hugtakið til samræmis við annað og þrengra hugtak sem notað er í 3. mgr. 4. gr. skáklaga.
17. Þessari skýringu mótsstjórnar er mótmælt. Í fyrsta lagi leikur ekki nokkur vafi eftir orðskýringu að skákmaður með íslensk kappskákstig getur ekki talist stigalaus. Í orðinu fellst að að keppandinn væri án skákstiga það er, hann hefði engin stig í íþróttinni skák, en þvert á móti hefur umræddur aðili 1625 íslensk kappskákstig. Í öðru lagi er ljóst að undanþáguákvæði ber almennt að skýra þröngt. Í þriðja lagi er rangt að skýra ákvæði 1. mgr. 19. gr. í samræmi við ákvæði 3. mgr. 4. gr. skáklaga sem snýr að vali á keppendum í landsliðsflokki. Réttara hefði verið, ef vafi léki á merkingu hugtaksins skákstig, að líta til ákvæðis 14. gr. laganna. Þar kemur fram að “[s]tjórn Skáksambands Íslands [láti] reikna a.m.k. tvisvar á ári skákstig fyrir íslenska skákmenn, sem þátt taka í skákmótum á vegum sambandsins eða aðildarfélaga þess. Stjórn Skáksambandsins setur nánari reglur um hvaða skilyrði skákmót þurfa að uppfylla til að vera tekin til útreiknings.” Ef fallist verður á túlkun mótsstjórnar eru íslensk skákstig í raun merkingarlaus og mikið rangnefni, enda ættu þau ekki heima undir yfirhugtakinu skákstig í skilningi skáklaganna. Enn fremur er tæplega unnt að fallast á að íslensk skákstig hafi enga þýðingu hvað Íslandsmót skákfélaga varðar í ljósi þess að Íslandsmót skákfélaga er í hópi þeirra móta sem reiknuð eru til íslenskra skákstiga skv. heimasíðu Skáksambands Íslands og chess-results.com.
18. Þar sem mótsstjórn fer þá leið að horfa til innra samræmis skáklaganna við skýringu ákvæðisins, telja Hrókar alls fagnaðar að betur hefði farið að horfa til þess orðalags sem þeir sem skrifa skáklögin nota í mismunandi ákvæðum og í því samhengi horfa til 3. mgr. 4. gr. skáklaganna. Þar er tekið fram að við val í landsliðsflokk á Skákþinginu, skuli horfa til alþjóðlegra skákstiga. Þar er ekki tekið fram að horfa eigi til skákstiga og er það vegna þess að reglugjafinn hefur ákveðið að í því móti, við val í þennan flokk, eigi að horfa til alþjóðlegra skákstiga í stað þeirra íslensku. Af þessu leiðir að ef reglugjafinn hefði viljað að undanþága 1. mgr. 19. gr. ætti bæði við um stigalausa, sem og þá sem eru með íslensk skákstig, hefði honum verið í lófa lagt að orða greinina með þessum hætti: „Aðeins þeir sem eru í Keppendaskrá SÍ teljast löglegir með viðkomandi félagi í Íslandsmóti skákfélaga (fyrri - og seinni hluta). Þó eru þeir skákmenn sem eru án alþjóðlegra skákstiga og án félags undanþegnir því að þurfa að vera í Keppendaskránni.“ Það var hins vegar ekki gert í 19. gr. og verður hún ekki skilin öðruvísi en svo að með skákstigum sé bæði átt við alþjóðleg skákstig sem og íslensk skákstig. Kemur þetta einnig skýrt fram á síðu chess-results.com, þar sem utanumhald um mótið fer fram og þegar umferðin er skoðuð sést að í 4. umferð í þriðju deild tefla á 5. borði annars vegar stigalaus maður, Samúel Gunnarsson fyrir Hróka alls fagnaðar en hins vegar fyrir SSON 1625 skákstiga maður, Guðmundur Óli Ingimundarson.
19. Hafi staðið til að láta undanþágu 1. mgr. 19. gr. ná til einstaklinga með íslensk skákstig en ekki alþjóðleg skákstig hefði það einfaldlega verið gert í ákvæðinu sjálfu. Ákvæðið hefði þá hljóðað svo: „Aðeins þeir sem eru í Keppendaskrá SÍ teljast löglegir með viðkomandi félagi í Íslandsmóti skákfélaga (fyrri - og seinni hluta). Þó eru þeir skákmenn sem eru án alþjóðlegra skákstiga og án félags undanþegnir því að þurfa að vera í Keppendaskránni.“ Í 4. gr. þótti rétt að tiltaka sérstaklega að gerð væri krafa um alþjóðleg skákstig. Það var hins vegar ekki gert í 19. gr. og því verður hún ekki skilin öðruvísi en svo að með skákstigum væri átt við bæði alþjóðleg skákstig sem og íslensk skákstig enda væri óeðlilegt að undanskilja íslensk skákstig á Íslandsmóti skáksveita.
3.5 Athugun mótsstjórnar virðist byggð á ólögmætri útilokunarreglu
20. Miðað við orðalag í úrskurði mótsstjórnar virðist sem mótsstjórnin byggi á einhverskonar útilokunarreglu og hafi aðeins tekið til skoðunar þau atriði sem mótsstjórn telji sig lesa úr kæru Hróka alls fagnaðar. Sóknaraðili mótmælir þessari aðferð og telur að mótsstjórn hafi borið að taka öll þau atriði til skoðunar sem skipt gátu máli við úrlausn kærunnar. Felst í því að mótsstjórn hefði einnig átt að taka til skoðunar hvaða afleiðingu það hefði að SSON hafi ekki skilað inn styrkleikaröðuðum lista í samræmi við 20. gr. skáklaga, en þar kemur fram að öllum félögum sem taka þátt í Íslandsmóti skákfélaga sé skylt að skila inn styrkleikaröðuðum lista allra þeirra keppenda sem þau hyggjast nota í keppninni. Felst það í raun í orðalagi kærunnar þar sem þess var einfaldlega krafist að mótsstjórn kannaði hvort SSON hefði verið heimilt að stilla liði sínu upp með þeim hætti sem þeir gerðu í viðureign sinni við Hróka alls fagnaðar. Sömu fyrirmæli og koma fram í 20. gr. skáklaga er einnig að finna í 2. mgr. 6. gr. reglugerðar um Íslandsmót skákfélaga og í 6. mgr. sömu greinar er tekið fram að brjóti félag gegn ákvæðum 6. gr. reglugerðarinnar við röðun í sveitir teljist þeir keppendur sem rangt er raðað ólöglegir. Með því að láta hjá líða að skila inn styrkleikaröðuðum lista eins og SSON bar að gera verður að telja að SSON hafi brotið gegn 6. mgr. 6. gr. reglugerðar um Íslandsmót skákfélaga. Guðmundi Óla var ekki raðað rétt á styrkleikalista SSON, enda enginn slíkur listi til staðar og verður því að líta svo á að honum hafi verið rangt raðað og þar með ólöglegur keppandi í skilningi framangreindrar reglugerðar.

Virðingarfyllst,
Helgi Brynjarsson f.h. Hróka alls fagnaðar.

Miðvikudagskvöldið 18. janúar 2017 fór fram héraðsmót HSK í skák fyrir árið 2016 í Fichersetrinu á Selfossi. Til leiks mættu fjórar sveitir frá Umf. Selfoss, Umf. Heklu, Umf. Gnúpverja og Dímon. Tefldar voru skákir með 2x15mín í umhugsunartíma og urðu úrslitin eftirfarandi: 1. Umf. Hekla: 10 ½ vinningar 2. Umf Selfoss: 8 vinningar 3. Umf Gnúpverja 3 ½ vinningar 4. Íþr.f. Dímon: 2 vinningar Vinningssveit Umf. Heklu skipuðu þeir Björgvin Guðmundsson, Björgvin Helgason, Jón Helgason og Guðjón Egilsson.


Eftir héraðsmótið fór fram hraðskákmót þar sem til leiks skráðu sig 12 keppendur og kepptu allir við alla. Umhugsunartíminn var 2x4 mín og urði þessir í þremur efstu sætunum. 1. Sverrir Unnarsson Umf. Selfoss 9 ½ vinningar 2. Björgvin Guðmundsson Umf. Hekla 9 vinningar 3. Ingimundur Sigmundsson Umf. Selfoss 8 vinningar Mynd: Sigursveit Heklu.
Tekið af vef hsk.is

Atskákmót SSON fer fram 5. nóvermber og hefst kl. 10 að morgni til Tefldar verða 5 umferðir 20-25 mín. skákir. Þátttökugjald er 1000 kr. og verður boðið upp a pizzur í hádeginu. Gera má ráð fyrir að mótið standi yfir til ca kl. 14.

Fimm vaskr sákmenn mættu á æfingu og var tefld 2x5 mín. 

1. Björgvin Smári 6,5 v.
2. Sverrir Unnars 5,5 v. 
3.-4.Magnúr Matt og Þorvaldur 3 v. 
5. Þórður Guðmunds. 2 v. 

Nýliðinn Þórður fékk 50% í síðari umferðinni og lagði bæði Sverri og Magnús, ekki slæmt af nýliða. Þetta varð til þess að Björgvin vann mótið þrátt fyrir að hafa fengið aðeins 1/2 v. gegn Sverri.