Nýbreytni á Suðurlandsmótinu !

Skáksamband Íslands samþykkti á fundi stjórnar í gær að sjá um útreikning hrað- og atskákstiga vegna alþjóðlegra stiga.

Suðurlandsmótið á sunnudaginn verður því fyrsta atskákmótið á Íslandi sem reiknað verður til alþjóðlegra atskákstiga !

Hafi enginn keppenda atskákstig fyrir miðast útreikningur fyrstu atskákstiga við kappskákstig sem menn hafa í mótinu.

 

Suðurlandsmótið á sunnudaginn !

Næstkomandi sunnudag hinn 26.maí fer fram Suðurlandsmótið í skák, mótið hefst kl 11:00 og má áætla að því ljúki um kl 16:00.  Teflt verður í Selinu á Selfossi.

Mótið verður með sama sniði og síðasta ár þ.e. 7 atskákir með umhugsunartímanum 20 mín.

Mjög góð verðlaun sem og veitingar í boði, venju samkvæmt!

Öllum er opin þátttaka ein einungis þeir sem lögheimili eiga í Suðurkjördæmi geta orðið Suðurlandsmeistarar.

Þátttökugjald 1500.-kr.

Núverandi Skákmeistari Suðurlands er Ingvar Örn Birgisson.

Hægt er að skrá sig til leiks með athugasemd við þessa færslu eða með því að hafa samband við formann SSON:[e-mail]

á myndinni má sjá yfir keppnissalinn á mótinu í fyrra en þá tóku 25 keppendur þátt.  Hér má sjá valinkunna snillinga s.s. Erling Jensson, Ingimund Sigurmundar fremsta, þar fyrir aftan glittir í Erling Atla að tafli við Kjartan Má Másson og Rimskælingurinn knái Jón Trausti er íbygginn meðan Sverrir Unnars er á spekingslegu rölti.

           

Sumarskák á Selfossi !

Það voru um 80 börn og unglingar auk einstaka fullorðins sem leið sína lögðu í Selið í dag.  Tilefnið  bæjarhátíðin Vor í Árborg.  Á móti gestum tóku félagsmenn SSON og buðu uppá tafl.

 

Margir reyndu sig við þá Björgvin Smára og Magnús Matt enda veglaun verðlaun í boði fyrir þann sem haft hefði sigur.  Þótt mörg tilþrifin litu dagsins ljós hafði engin að sigra meistarana enda það ekki aðalatriðið, heldur að taka skák, sýna sig og sjá aðra á þessum fallega vordegi á Selfossi.

 

 

Gaman að sjá áhugann hjá ungu kynslóðinni og ljóst að framtíðin er björt og gaman verður að sjá þessa framtíðarskákmenn mæta til leiks í Fischersetri í haust en fyrir liggur að bæjaryfirvöld hafa lýst yfir áhuga sínum að styðja við skákiðkun þeirra á haustdögum og til framtíðar.

Vor í Árborg

Á sunnudaginn munu félagsmenn í SSON taka á móti gestum og gangandi í Selinu og kynna fyrir þeim skákíþróttina.

Viðburðurinn er liður í bæjarhátíðinni Vor í Árborg.

Gestum mun gefast kostur á að tefla við meistara félagsins og kynna sér starfsemi þess.

Selið verður opið á milli kl 12 og 14.

Tímasetning komin ! ...uppfært

Suðurlandsmótið fer fram laugardaginn 25.maí, tefldar verða 7 umferðir, atskák.  Áætla má að mótið hefjist kl 10 og ljúki um kl 17. 

úrslitaeinvígi um titil Íslandsmeistara í atskák fer fram þennan dag og verður sýnt beint frá viðburðinum hjá RUV.  Margir skákmenn munu ætla sér að fylgjast með því, því verður Suðurlandsmótinu mögulega frestað til sunnudagsins 26.maí. Nánari upplýsingar hér á síðunni síðar.

Skoðanakönnun !

Birt hefur verið skoðankönnun á síðunni varðandi dagsetningu á Suðurlandsmótinu.  Hana má sjá vinstra megin á síðunni.

Suðurlandsmótið 2013 !

Venju samkvæmt fer Suðurlandsmótið í skák fram nú á vordögum, tvær dagsetningar koma til greina, 25.maí eða 1.júní. Endanleg ákvörðun um dagsetningu verður tekin mjög fljótlega. 

Mótsstaður verður Selfoss eða nærsveitir, venju og góðum siðum samkvæmt.

Þetta verður í 5.sinn sem SSON hefur forgöngu um að halda mótið frá því að það var vakið úr löngum dvala.

Mótið að vanda öllum opið, en einungis þeir sem lögheimili eiga í Suðurkjördæmi geta orðið Suðurlandsmeistarar.

Mótið verður með sama sniði og síðasta ár þ.e. 7 atskákir, tefldar á einum degi.

Núverandi Skákmeistari Suðurlands er Ingvar Örn Birgisson, en hann vann mótið í fyrra eftir bráðabana við Nökkva Sverrisson og Pál Leó Jónsson.

SSON átti flesta keppendur í fyrra eða 10, Taflfélag Vestmannaeyja mætti með 3 öfluga keppendur og síðan kom fjöldi keppenda víðsvegar að af landinu, en keppendur voru 25, eilítið færri en árin áður.

Mjög góð verðlaun sem og veitingar verða í boði, venju samkvæmt!

Líklega verður Hraðskákmeistaramót Suðurlands teflt sama dag eða sömu helgi.

Hægt er að skrá sig til leiks með athugasemd við þessa færslu eða með því að hafa samband við formann SSON:[e-mail]

             MM MMXIII

Vor í lofti..

Þegar fækka tekur á skákæfingum hjá SSON liggur fyrir að vorið er komið og sumarið bankar á dyrnar, eigi að síður mættu 5 höfðingjar til skákiðkunar í kvöld og tefldu 7 mín skákir, tvöfalda umferð.

Björgvin Smári og Magnús áttu ágætis spretti, að minnsta kosti betri en aðrir og voru efstir og jafnir fyrir síðustu umferð þar sem þær mættust og Björgvin hafði góðan sigur og sigur á mótinu þar með.

Lokastaðan:

1. Björgvin     7
2. Magnús      6
3. Páll Leó      4
4. Ingimundur 3
5. Þorsteinn   0

Í ljósi ofangreinds fer nú að draga úr skákæfingum þannig að menn geti sinnt vorverkum á bújörðum sínum eins og vera ber.  Að sjálfsögðu verður tilkynnt hér á síðunni þegar meiriháttar skákviðburðir eru á dagskrá en þeir eru nokkrir áður en skáksettum verður pakkað niður fram að hausti.

Vormót SSON !

fer fram miðvikudagskvöldið 17. apríl, tefldar verða 10 mín skákir.  Stjórn hvetur félagsmenn til að mæta vel til leiks.

Atskákmót á miðvikudegi.

Selið kl 1930 að vanda, tefldar verða 10-15 mín skákir.

Ís í boði Kjörís.

 

 

 

 

formaður forfallast í kvöld og biður því aðra að nálgast lykla.